|
Mr hatten ben baue gerod noch dra gedacht, doß mr in dare Skihütt aa en Platz braucheten, wu mr e paar Flaschen Bier un aa noch e paar Flaschen zun „starken Tee” machen hiestelln kunnt’n. Also hatt’n mr zwischen dr Stammeck un dr Küch e Loch gelossn, wu mr Bierkasten un e klaans Regal für annere Flaschen aufbewahrn kunnt’n.
Gruß wars net, oder dr Roscher Arn maanet für ihn täts schu reing un wenn ar sich zamm namme tät, kriegeten aa mir annern wos ab.
Nu hattn mr ober net weit gedacht, bei dr erschten Vierbereiting, mer wollt’n e schiens Skirenne für uns machen, kame Leit, ah sette die net eigelood’n warn, die mir ah alle kannten, ah mochten, ah Schneeschuhfahrn kunnt’n un drzu uns ah noch halfen wollt’n, un wos soll iech eich soong, vun Biertrinken kunnt mr noch ner Stund nimeh reden.
Geleich am nächsten Tog wur nochgedacht, ahgeguckt, sich neigestellt ins Loch, un geleich ahgefange mit budd’ln. Mr hatten ja nooch unten kaane Stah un dar Drack ließ sich mit Hack un ennr obgesaachten Schaufel gescheid raushulln. När mußt’n mr gede Schaufel in en Eemr fülln un aus dr Hütt troong. Noong dare ahstrengender Arbet, mr warn dr Maaning, ’s Loch tät nu zweh Fäßer Bier un drhinner noch e paar Kasten passn un e klaans Regal tät aah noch neipassn, hattn mr dos geschafft.
Un mr kah’s fast net gelaabn:
– Ne Roscher Arn war’s ze gruß — ar hat schie lang kaa Lust meh,
– ne Reiter Jög war’s ze klaa — ar mußt ober fort,
– un mir war’s gerod racht — weil iech endlich aus’n Loch wollt.
Es sollt ober nett lang esu bleim, wie mr dachten. Schie im arschten Winter tat unner Kaller nu wieder nimmeh reing un e neies Budd’ln kam off uns zu.
Im Friehgar, emende kas im April gewasen sei, do gings budd’ln wieder lus. Mr warn itze e paar meh die zupacken taten. Do mr ober unner dr Küch hie, üm de Eck nim buddln mußten, mr wolltn itze de Bierleiting direkt zun Thresen für’n, hattn mr ganz schie zu tuh, weil mr ah itze tiefer warn, als benn erschten Mol, kam ah e ganzer Hauf’n meh zam, dan mr aus Loch raushack’n, in Eemr füll’n, huchhehm, naustrong, hieschütt’n, verteel’n un wieder glattmach’n mußt’n.
Ober, wie mr su sogt: „Mit dr Zeit bliehe Hackstäck” tat ah diese Wercherei e End namme.
När, doß dos Gebudd’l dodrmiet noch kaa End hoom sollt, homm’r zen Gelück ze dare Zeit, wie mr fruh warn alles esu schie geschafft ze ham, noch net wissen könne und dos war aa gut so.
|
