aus’n
„Kopp“  wies 1971 un drnoch esu zugange war

Ze dare Zeit,  emende im zweeten Gahr,  wu mr aah enn richting Ausschank in unnerer Hütt täting taten,  hat iech in dr Rasche ne Bierabfülling aufgetah, mit dar mier e gut’s Bier ausschänken konnten.

Dos Bier,  wos mr vun dorten bezung hoom,  war vun dr „Köstrizer Brauerei” un war unnern Gästen un ah uns salberscht e „Köstliches Gesöff”.

Dodrzu sollt mr heitzetog wissen, daß ’s domols in dr DDR mehstns när Bier aus Karl-Marx-Stadt ze kaafen gob, un dos hatt’n mr alle soot. Schmeck’n tats wies aussog, wemmr ne Flasch ahsahe un dann ümdrehe tat, mußt mr fruh sei, wemmr när eewing Flocken drinne schwimme sah.

Ahfangs sei mr mit’n Taband-Kombi Bierhuhln gefahr’n, aa hatt’n mr manichsmol vun Burkert Herb, bei dan dr Arn arbet’n tat, en Framo, wu mr geleich vier Fäßer loden konnt’n, bekomme.

Wie iech nu wieder emol zun Bierbestell’n noch dr Rasche gefahrn bie,  mit nr ieblich’n Pralinenschacht’l mei Zefriedenhät kundtuh un neies Bier huhln wollt,  wos aa prima gelang,  wur mier gesaaht,  un iech sollt mich schnell dodrauf eistelln,  dos mit’n End des Gahrs aa dos Köstritzer auslaafen tät, weil dr Bezirk Karl-Marx-Stadt dos aangscheinlich su wollt.  Kaa uhiessches Bier durften se meh vertreim.

Iech,  eham,  zur Hütt hie,  dan Kaller ahgeguckt,  dos Eischlicht’n der Fäßer ohgeschätzt,  laafnd is Wutwasser vun dr Wang gewischt,  wieder gemass’n und geschätzt. —  Do mir oder schu begonne hatt’n dan Eigang noch dr annern Seit nimm ze baue,  un de Küch mit dan Vierhäus’l ze Vergrößern,  mußt itze aa noch wos mit’n Kaller posementiert warn.

Do iech in Bargbau gelarnt hatt’,  schieh klaa war un ze dare Zeit aa noch ewing gelampr mit men Köper umgiehe kunnt,  hatt’n dr Reiter Jörg,  dr Scholz Kon,  dr Pollmer Armin, un noch e paar annere,  mit rümguck’nde Sportfreind,  schnell derfaßt,  war ins Kallerloch mußt.

De arscht’n Eemr mußten wieder nausgetroong warn,  bis iech en schmoln Gang zer Grundmauer,  ahngtlich e Meierle,  hie gemacht hat.  Nu wur viersichtich e Loch ins Meierle gemacht,  de Seit ohgefange,  daß se net eifällt,  un nu kunnt dos gruße Naustroong durch dos Loch gemacht warn.  Nu ging de Arbet schie e ganz eweng lechter.  Mr brauchet net durch de Gaststub der Hütt.  Dr Reiter Jörg,  dr Pollmer Armin,  dr Aßmann Rud un aa iech — wenn iech net gerod im Loch stock — kunnt’n mit ihr’n Weibern in dare Zeit in dr Hütt de Gäst bediene,  ohne dos de Arbet im Kallerloch unnerbrochen warn mußt. Zu dan uhm genannten warn aa zwee Gunge,  dr Heldner Diet und dr Patzeld Jörg oft miet beim Werchen,  um unnere Hütt fertig ze krieng.

Wie nu dr Kaller soot gruß gewurn war,  kunnt’n mr die Bierfäßer geleich ahliefern lossen,  suviel taten neipass’n.  Un als nu dos Gahr ze End ging,  dos Ugelick immer näher kam,  dos Köstritzer Bier nimeh zu bekomme,  hoom mr ne Kaller bis unner de Deck mit Fäßer voll geschlicht,  su dos mr geds Fäßl wos leer wurn war,  über de Gaststub nausreime mußten,  da de voll’n bis übern Kallerfanster huchgeschlicht wurn warn.

Wieviel’ dos warn, kaa iech eich soong, ’s warn fei reichlich soot, när von de Zohl’n mag iech eich nischt soong.

von pks