De Weihnachtszeit im Arzgebärg,  die hoot enn engne Reiz,
De Toog salbst zeign kenn Unnerschied,  von frieher bis off heit.
Gewiß!   ’s is maches annersch wurn — do gibs nischt ze verwetten,
Doch feierlich bleibm für uns doch de Schul- un Kirchn-Metten.

enn heit e Mancher annersch denkt,  dans Labm hot scharf belehrt,
Dar grübelt an sein Schicksal rimm,  is salbst sich nimmer Harr.
Un doch,  als Kind zur Weihnachtszeit,  wie gruß war oft dr Jubel,
Dr Vater ging ins Tannereiß’g — de Mutter buk — dar Trubel.

Lang — ach lang — schu vir dr Zeit — off’s Backen wur gespart,
Wars halbwag möglich machen kunnt — hot lieber drimm gedarbt.
Un rücket Weihnacht näher ra — ach war dos e Betrieb,
Gearbeit’ un gebastelt wur — gesunge manches Lied.

mol,  nachts in dr zweeten Stund,  mir warn direkt erschrocken,
De Tür ging auf — un wer kam rei,  in Unnerhus un Socken?
Dr Nachbar wars,  er saht ze uns:  „Mer sollten net erschracken,
In dorf wär Feier — stürme täts — er hot uns blus wolln weckn”.

Vom Nikles wag,  do hieß egal — seit ruhig,  dr Rupprich horcht —
Mr hat als Kind a seine Sorg — in übergußer Furcht.
Mr trauet salbst sein Schatten nett,  wenns hieß — ihr Kinner!  marsch ze Bett,
Paketleweis gings in de Kammer — oft wars e Lust — oft gobs a Gammer.