|
Dr Dokter Halter in Geringsdorf war a fidels Haus, wie mr su sogt. Daar ging gelei vun seine Patienten in de Kneip un vun dr Kneip ze seine Patienten. Dodrbei war ar immer lustig un guten Muts un hot manchen dorch senn Witz de letzten Stunden erlechtert. Ar hot a sist viel Guts gestift’t, denn ar verstand sei Fach. Nä wenn ar en Spitz hatt’ un nachts aus dr Kneip gehult wur, dos war net noch senn Geschmack.
Amol hatt’ dr Knacht vun Grußbauer ’s Baa gebrochen, als ar vun Fald kam. Dr Halter wur aus dr Schänk gehult un verlur vor Wut gelei en „Grang mit Viern”. Als ar nu hiekam, fuhr ar dan Knacht a wing borsch ah un renket’s Baa ei un verpacket’s. Dr Knacht, daar erscht noch a Eiwending machen wullt, hielt de Gusch, als ar vun Dokter zur Antwort krieget: „Dos muß ich besser verstieh!”
Dr Dokter ging aham. Dr Knacht oder wußt gar net, wos ar vor Schmarz ahfange sullt. Un als dr Halter ne annern Morng kam un nochsaahe wullt, do — do market ar, doß er’sch falsche Baa eigerenkt hatt’!
|
