„Wu  gieht  dä  die  Alte  nu  schu  wieder  hie?”
Su  frog’n  siech  de  Nachbarn,   ’s  is  bal  nimmeh  schie.
„Ged’n  Mittich  um  zwee  ’e,   do  macht  se  siech  fort,
fährt  egal  stadteiwärts.   Wos  will  se  bluß  dort?”
Doch  iech  loß  se  red’n,   se  maarn  morgn  su  wie  heit,
iech  frei  miech,   doß’r  kimmt  un  aah  pünktlich  is  heit.
D’rweile  berot’n  de  Leit  drubn  in  menn  Haus:
„Hot  se  ebber  noch  e  Mannsbild?”  Do  lach  iech  grodnaus.
„Bei  daar  tickt’s  nimmeh  richtig”,   su  hör  iech  se  sogn,
„noch  enn  Ma  in  dan  Alter,   ka  die  dos  vertrogn?”

Sitzt  is  Hüt’l  aah  orntlich  un  is  Tüch’l  üme  Hals?
Noch  paar  Pfeng  nei  d’r  Tasch  un  fort  gieht’s  of  d’r  Balz.
Un  nort  haaßt’s  aufpass’n:   De  erschte  Bah  muß  vorbei,
doch  in  d’r  nächst’n,  die  kimmt,   do  mach  iech  miech  nei.
Mannichmol  kimmt’r  pünktlich,   nimmt’s  net  su  genau,
oft  bie  iech  aah  erseht  retur  bei  d’r  Ob’ndschau.
Su  wart’  mit  vieln  annern  aah  iech  of  dr  Bank  miet,
do  faucht’s  um  d’r  Eck,   als  wenn  de  Walt  unnergieht.
Dos  is  d’r  e  Gequietsch,   e  Gezisch  un  Geknarr!
Oder  dos  darf’r  machn;  denn’r  kimmt  vun  weit  haar.

De  halblaar’n  Kuffer  sei  durch  de  Fanster  im  Nu,
in  drei  Woch’n  braucht  m’r  zun  Ast’n  zwee  Mann  d’rzu!
Itze  ginne  de  Türn  auf,   is  dos  e  Gedräng’,
die  haat’s  ja  bal  ro  wie  ne  Grünerts  vun  Stangl.
Se  kumme  vun  Sayde,  Dörntol,  Zeblitz  un  Seiffn:
„Nu,   gutn  Tog,   mr  sei  do,   ’s  is  net  ze  begreif’n!”
Do  siste  de  Hedwig,   ne  Heinz,   de  Ann  un  ne  Franz,
ganz  hint’n  kimmt  de  Hulda  un  ihr  Hug’  ahgetanzt.
Wie  eirisch  ward  dischkeriert,   ach,   is  dos  ne  Lab’!
Iech  här  mei  Mutt’rsprooch  wieder,   die  köstliche  Gab’.

Sei  se  alle  nazamm,   namme  se  siech  bei  d’r  Hand
un  vöder  gieht’s,   noch  voll  Stoff  bis  zun  öber’n  Rand.
Is  D’rzehl’n  un  Storng  gieht  erscht  richtig  lus  d’rham,
dos  ward  fei  trotz  Müdigkeet  ne  lange  Nacht  gaab’n.
Nu  ho  iech  eich  lang  soot  of  d’r  Folter  gespannt,
emende  habt  or’sch  mittlerweil  salberscht  d’rkannt.
Mei  Stelldiechei  of’n  Bahnhuf  is  ganz  fix  d’rklärt:
Dos  is  naamlich,   wenn  d’r  Zug  aus  Leipz’g  eifährt!
Ged’n  Noochmittich  halb  viere,   off’n  Bahsteig  Gleis  sieb’n,
brängt’s  dan  aus  d’r  fern’n  Haamit  ahgetrieb’n.

Ho  aah  Dank,   gute  Lok,   fahr  nooch’n  Lokschupp’n  nüber,
bist  wieder  fleßig  gewaas’n,   frei  diech  drüber.
Ruh  diech  nooch  daar  gruß’n  Plog  fei  rächt  schie  aus,
morg’n  früh,   halber  neine,   gieht’s  zun  Loch  wieder  naus.
Un  noch  aans  mächt  iech  d’r  of’n  Rückwaag  mietgaab’n:
Namm  viele  harzliche  Grüß  an  unner  Haamit  miet  eham!

Aus :  Glückauf” — Zeitschrift des Erzgebirgsvereins EV, Februar 1986

bearbeitet von pks