Wos dr Thomashenner off dr Kaat derlabbt hot
          vom Grußvoter aus dr Sehm

          Wenn dr Henner sinst aah gerod net a grußer Freind vun de Fastlichkeeten war, ober off de Kaat ¹) wur gange.  Wochenlang zevur mußt sich sei Fraa,  de Lowine,  schie drauf eirichten,  doß de nöting paar Grosch drzu übrig bliem.  Virmittig beizeiten wur sich schie off de Socken gamacht.  Weil se keene Kinner hatten,  hielt se aah nischt o.  „Weßte wos,  Lowine,”  saht dr Henner, „dosmol sei mer gescheiter,  mir namme uns Fietzen ²) off ne ganzen Tog mit.  Wos mer do an Esserei spar’n do drfür könne mer a bissel wos ahsaahe.”  „Do haste racht,  Alter,”  saht de Lowine,  „iech ho,  wie iech de Woch in Milnaa ze Rocken ³)  war,  a halb Pfund Worschtfett vun Beier-Ferdenand mietgebracht,  dos is a wahrer Genuß.  Do ward zu de Fietzen ’s Bier off dr Kaat ober schmecken.”

¹) Trinitatisfest der Annaberger            ²) Bemme, Schnitten            ³) mit dem Klöppelsack auf Besuch gehen

          Fruh un wuhlgemut sei se lusgestiefelt.  Ei, war dos schie a Specktakel,  wie se nei off ne Kaatplatz kame,  Zirkussen,  Tierbuden,  Dampfreitschul,  Sachen,  die noch gar net do war’n,  ’s war zun Maul- und Aangaufsparr’n.  In ener grußmachting Bud kunnt mer ne ganzen Krieg saahe,  dan dr Wißma ¹)  mit senn Soldaten in Afrika führet. Do is dr Henner mit seiner Lowine nei. Wie se nu dan Theater ne Weile zugesaahe hatten, stißt ²)  dr Henner sei Alte un sogt:  „Du,  Alte,  iech loß mich frassen,  daar Wilde, daar an verwerrtsten tut, dos is erscht seit heit früh a Wilder. Weßte, waar dos is? Dos is dr Steebracher-Lui, daar bei uns in Loschie waar, wie de Bahn gebaut wur. Ich waar’n geleich amol froong, do warschte saah, iech ho racht.”

¹) Major Wißmann            ²) stößt


           Wie nu dr Wilde net ze weit vun se wag war,  sogt dr Henner zu ne:  „I nu,  Lui,  bist dä du’s werklich?  Tu när net asu verwerrt!”  Daar dreht ne ober a paar Kaasnapple ¹)  na,  als wullt ar ne frassen,  un gob ne zzur Antwort:  „Halt när dei Gusch,  Henner,  iech bie doch a Wilder!”  Nu hatt’ dr Henner un sei Lowine genug gehärt,  se macheten,  doß se aus daare Bud naus kame.  Weil se nu rachten Appetit kriegt hatten,  ging’s wieder in ner Bierbud,  de Lowine will de Worschtfett-Fietze’n aus ne Handkorb namme,  ober o Schrack,  net amol ’s blaagetappelte Tüchel war noch drinne.  Wärend se in daare Wilden-Bud war’n,  hatt’ sich su a hungeriger Köder über der Lowine ihr’n Handkorb gemacht un die 4 Paar Fietzen gemaust.  „Lametier när net,  Alte,” saht dr Henner,  „itze giehe mir an Markt in die Kaffee-Schenk,  kaafen uns ne rachte Kann Kaffee un a wing Kuchen un giehe aham,  iech ho heit soot Kaat.”  Doß se senn schinn Spazier-Stacken mit’n echten Hirschhorngriff vertauscht hatten,  hot ar dr Lowine erscht später gasaht.



Aus : „’s is fei kaa Lüg”    Annaberg,  Grafers Verlag 1911,  Heft 28


bearbeitet von pks