|
r letzte Summer war wieder amol aaner gewaasen, wu geder Landma sei Freed dra hot könne hoom, un aah dr Harbist war zur vull’n Zefriedenheet ausgefall’n. Dr Teichlob war dozemol aah racht gut gefahr’n, ar hatt’ senn Schnitt mit’n Flachs un Hober gemacht. Der Flachs zu daare Zeit dr Rausreißer. Wie dr Lob mit’n Draschen fartig war, wur dr Flachs noch Wiesenbod gaschafft. Weil ar ganz besonnersch schine War hot liefern könne, hatt’ ar en Toler extra kriegt, wofür ar sich fürgenomme hatt’, sich amol wos zu gut ze tu.
„Vorsicht is de Mutter geder Porzellikist!” Dos war ne Lob sei Sprichwort; aus dan Grund ließ ar aah net garn gruß viel Gald drham lieng, wenn ar kunnt a paar Toler off de Kant tue, wurn se off de Sparkass nooch Annebarg geschafft.
n su en rachten schinn Januartog hatt’ ar sich ausgemacht, sei Geschäft off dr Annebarger Sparkass ze erleding. Weil ar’n Ohmd zevor in Blattel gelaasen hatt’, doß in dr „Bleibe” Bockbierfast un Doppelschlachtfast war, hot ar gar net erscht viel drham gegassen un hot sich racht drzu gehalten, doß ar när fort kam. Wie ar nu off dr Sparkass sei Sach besorgt hatt’, gieht ar erscht amol zu seiner Schwaster, die an en Annebarger verheirat war. Wie die ne Lob asu ahsieht, saht se: „I nu, Lob, du bist doch in dr Unnerzieh-Hus!” Do hot sich dr Lob erscht richtig besaah un gesaht: „Mienel, nu waß ich aah, worüm mich de Leit asu ahgeguckt hoom, un worüm die Bossen off dr Sparkass asu gelacht hoom.”
u hot’n när sei Schwaster, ’s Mienel, von ihr’n Ma ne Hus besorgt, un weil’s ne racht schiene war, hot ar aah de blaae Schörz net drüber gebunden, ar kunnt sich off ne Bockbier- un Schlachtfast saahe lossen. Wie ar nu ’s zweete Gelos Bockbier bestellt hatt’, freegt’n dr Kellner, öb ar aah a bissel Rettich hoom wullt. „Naa,” saht dr Lob, „dan hob ich salbersch drheeme, ober a bissel Gratis tät ich assen, dos ho ich noch net gegassen!”
Wie ne dr Kellner dorüber aufklärt, wos „Gratis” zu bedeiten hot, hot’s ne dr Lob ober geteckt, ar hot gesaht: „Ihr Stadtleit denkt egal, ihr seid wos bessersch, ihr kunnt doch geleich ins Blattel schreim, ne Rettich krieng de Gäst ümesist!” De annern Gäst hoom tüchtig gelacht, bluß aaner, daar sich de Haar hatt’ racht lang net oschneiden lossen un ne Brill trug, hot’n racht gaam, indem ar saht, mir braung de Fremdwörter net. Dr Lob is ober drhalm net gange, ar ließ sich ne rachte gruße Portion Wellfleisch un Sauerkraut brenge, wos ar sich racht schmecken ließ.
u hatt’n dr Kellner ober aah en tüchting Napp Senf mit hiegesetzt. Wie ar mit’n Wellfleisch un Sauerkraut fartig war, fängt ar halt aah ze löffeln un ißt ne ganzen Napp Senf aah mit aus! Do hot’s ’n ober dos Wasser pfützenweis aus de Aang getriem, un de annern Gäst hot’s für Lachen ball zerruppt. Wie ne dr Kellner bein Bezohl’n frogt, öb’s geschmeckt hot, saht dr Lob: „Dos Wellfleisch un’s Sauerkraut war gut, ober daar Appelbrei taagt net viel, daar is ze scharf!”
|
