Is gibt enn Sport, daar is uralt,
doch heit noch ganz modern,
schu unnre Altn kanntn dan,
dan braucht mr net ze lern’.
Eb Summer oder Winner is,
dan ka mr stets ausübn,
eb speet, eb früh, be Sunn un Regn,
d os is net übertriebn.
lech saah, eich trebt de Neigier um,
wos dos for Sport könnt sei,
dan geder uhne Ausnahm trebt,
drum sog iech ’s eich aah glei.
Is Thema Nummer aans is net
dos, wos ihr alle denkt,
daar Sport is of’n zweetn Platz
fei lange schu verdrängt.
Denn bei dan Sport, do gibt ’s aah net
gewinne un verliern,
daar Sport, ihr rotet’s doch net meh:
Dos is . . . is Lamentiern!
Dos gieht bei manichn früh schu lus:
„War dos heit ene Nacht!
lech ho fei, glabste’s oder net,
kaa Aach net zugebracht”.
„ lech bie su steif bal wie e Bratt
un ka miech fast net rührn,
un in menn Kopp, do rauscht’s när su,
miech tut’s aah richtig friern”
„ Ich glaab, dos muß is Watter sei,
is zieht aah in de Baa.
De Arm, die hänge ro wie lahm,
un in Genack sticht’s aah.”
Un speeter kimmt de Nachbarn rüm,
do gieht dos wieder lus:
„lech ho’s fei heit su darb in Kreiz,
wos macht mer da do bluß?”
„ Mei Ma kimmt net vun Abtritt ro,
aah unnrer Mad is bies.
Is ward doch net vun Assn sei?
’s gab Schöpsenflaasch un Kließ.”
„’s könnt ober aah e Virus sei,
mr hört’s vun viele Leit,
dos hängt mit dan Atome zamm,
ach, is dos ene Zeit!"
Daar hot’s in Kopp un daar in Mogn,
e annrer in de Knie,
do ka is Watter sei, wie’s will,
su gieht dos speet un früh!
Su hol mr ober gederzeit
e Thema, Gott sei Dank!
Denn wär mr ganz un gar gesund,
do war mr raanewag krank!
