entnommen einem
„ Erzgebirgischen Heimatblatt “ einer Beilage der  Obererzgebirgischen Zeitung.

Wenn´s draußn wieder schneit, un iech esu dann Flockentanz zuguck, kimmt mir mannichs aus vergangener Zeit in Sinn. Es wärd e Gahre 30 har sei. Iech hatt´ en treie ältern Freind, dar gehäret mehreren Vereinen ah. ´r nahm miech öftersch miet ze seine Vereinsohmd´. Inu wars do schieh. Iech muß immer denkn, esu sei de Leit garnimmer. Hobn die sich unnerenanner geschpaßt. Dos war alles wie ene gruße verträgliche Familie. Es war ene richtige Lust, do zuzuhärn´. Doß siech do äner ebber wos übelgenumme hätt´, nett dra ze denkn, suwos gobs ahm garnett. War ahm verutzt wur, unn kunnt siech nett wieder obfindn, dar ließ´s ahm über sich ergiehe. Unner solcher Spaßerei wursch fei imme dreie, eh mr siech versoog. Zum End´kam nu unner die letzten ah öftersch noch ene Verabreding zestand. Im Sommer ebber emol e Wandering ze Fuß, in Winter, wen´s gerod passet, ah e Schietenpartie. Su wur nu ah emol ene solche Partie ageregt un kam ah zestand.

An en schin kalten Wintersonntag fuhr´n in drei Schlieten, gut in Decken verpackt, jeder mit äner Wärmflasch versahe, die Vereinsbrüder nooch Weipert zu. Dort agelangt, wur nu in mehrern solchen Weinstüble dr Wein ofsenn Geschmack hie versucht. Nu, er war fei emol besser wies annere Mol. Drunnernei wur ah gut böhmisch gassen, un is kam ah jedr off seine Kosten, is war ahm schie. In äner Kneip warn se aber doch dr Mäning, dos do ne bestn Wein gäb un hätten gern ewink miet ehäm genumme. Aber wie dos machen, im net wang ne Zoll erwischt ze warn. Ener menet, mir schpieln unnere Wärmflaschen aus, unn fülln se mit solchen guten Wein. Unn esu wursch gemacht, natürlichganz hämlich, doß ah de Kutscher nischt merketn. Se brochen auf, fuhr´n wieder noochn Sächsischn zu un hohm in ihre Schlieten tüchtig gefrorn. In Barnstäh beschlossen se doshalb noch emol eizekehrn un es war wieder schie. Es wur ze Ohmd gassen ungetrunken, bis se ball nimmer kunnten. De Kutscher sei bei dare Sach ah net schlacht wagkumme, un warn racht dankbar gestimmt.

Se wulltn ihrn Fahrgästn ä rachte Fräd machen, un beschlossen unnerenanner, se willten siech in dr Küch enn Toppkochend Wasser machen lassen. ihre Fahrgäst freng, welche Zeit se abfahrn willten un nu zuvor racht schiene heeße Wärmflaschen in de Schlieten schtelln. Schtockrammelfinster warsch in dann Wirtshaushuf, wuhie se de Wärmflaschen ausgossen, sonst hätten se singe könne, „es fließt statt Wasser Wei”, aber an das Lied dachten die do nät. Geschwind in de Küch un nu de Flaschn mit dann heeßen Wasser gefüllt, un in de Schlieten neigestellt. Nocherts wur a aufgebrochen, un wie Hohm se siech alle gefräd, wies esu schie warm in de Schlieten war. Un de Fahrt ging dr Hamit zu.

Es war ne annern Tog schie schpeet, wie mei Freind beim Morngkaffee sitzt. Er paßt auf, wie dos Schmatzel esu of sänn Kaffeeschalle tanzt, un denkt an dann schinn vergangene Tog. Off emol kimmt ne dar Gedanke off dar Wärmflasch. Trinkt dann Kaffee mitsamtne Schatzel nei, schtieht auf un huhlt de Wärmflasch har. Es Schtand a e Gelos do, gießts voll un kost, ober r traut senn Lippen net racht, huhlt e Gelos aus´n Gelosschrank. gießt ei, es ward net annersch, es schmecktahm esu richtig wie - Wärmflaschenwasser. Nu zieht r aber geschwind sei Frackel ah, setzt Pelzmützel auf, un gieht zu dann Fuhrwarksbesitzer un fregt nooch dann Kutscher. Nu dar war schie längst bei dr Arbet, r suchten auf un schpricht zune: „Hat ihr dä unnerwags wos mit de Wärmflaschen gemacht?”. „Ja,” sogt do dr Kutscher, „die hohm mr ausgeschütt, un wieder mit heeßen Wasser voll gemacht”. „inu ihr Tof . . ., ” sogt do mei Freint, „do war Wein drinne”. Dr Kutscher wur kasweiß, ober ändern kunntersch ah net. Nu mei Freind setzet siech ah drüber wag. Er war bluß neigierig, wos all die Freinde song würn. Ober gelabbtersch dä, von die hot käner wos gesaht. Wenn äner ne annern gefregt hot, wie dar Wein geschmeckt hot, krieget r immer zur Antwort: „Gut, gut!”

bearbeitet von pks