|
Dr Richter-Dav war vun Suldatn wag noch dr Satzing als Lehrer kumme. Noch dr Schulstund machet ar garn in senn Kammerle Gewehrübing. Do hot ar sich vun senn Grußvoter su en alten Schießprügel gehult un dodrmiet hantieret ar in dr Stub rüm.
Weil de Stub net gruß war un a weng länglich war un hinten in dr Stub dr Spiegel stand, mußt ar seine Übing noch dr Tür zu machen. „Prasentiert das Gewehr!” „Das Gewehr über!” kommandieret ar sich salbst, „Ausfall nach vorn,” un wies nu su ben Militär gemacht ward. Wenn mer dos sooch, do kunnt’s Voterland singe: „Lieb Vaterland, kast ruhig sein!”
Wie ar mol su übet, wullt gerode de Liebguste zu ne nei un wollt sich bekloong, daß ar ne Gung noch ihrer Maaning aweng ze darb geprügelt hätt. Se kloppet an seiner Tür ah, oder dr Richter-Dav gob’s Kommando: „Batallon soll chargieren — geladen!” un häret nischt. Se pochet noch amol. Ben Resevist kam nu ’s Ahleeng dra: „Legt an!” Dr Guste tats oder nu doch a weng ze lang dauern. Se riß de Tür auf. — — Do sooch se de Flint off sich gericht, un de Tür zu schmeißen, de Trepp nunner feeng, waar ees. Un drunten schrier se derbost: „Nä, su a Schulmaaster, menn Gung hot ar ball drschloong, un miech will ar nu gar noch drschießen!”
|
