De Schuster hoom en Streik begonne,
se warn aah wärklich garschtig dra;
un trotzdam homm se nischt gewonne, —
nu fange aah de Meirer ah.
Die hoom sich gar net ze bekloong:
net ze viel Arbit un viel Luh.
„Wos streik ihr dä?” tat iech se frong.
„Worüm mer streicken?” — — Nä asu!
Ne Karl sei Fraa, nu dos Raketel,
die maledeit ne ganzen Tog,
ball schleegt se wütend off ihr Madel,
ball trifft ne Gung a darber Schlog,
un salbst ihr’n Ma tut se net schune,
daar is solid un gut drzu;
er freegt se, un do sogt se zu ne:
„Worüm ich zuschlog? — — När asu!”
Dr Braugust, ich ka’s net verstiehe,
er hot’s so gut, wie mer när denkt;
sei Laadl ka net besser giehe,
un hot sich zweemol schu gehenkt.
Kaum war er’sch zweete Mol von Baam,
zun dritten Mol nu hängt er schu.
„Sog, worüm giehste de dir ans Laam?”
Freegt alle Walt. — „Nu, när asu!”
Un freeget mer mich: „Wos soll dos dichten,
worüm zerbricht de dir ne Kup?
gieh naus, frä dich an Tann un Fichtn
un bleib net su in deiner Stub!
Worüm tust de dä Vaarschle schreim?
De hast doch amol nischt drfu,
an deiner Stell ließ ich dos bleim!”
„Worüm ich dicht? — nu, när asu!”
