entnommen einer Seite des
„ Erzgebirgischen Heimatblattes ” ohne Datum und Jahrgang.

     Su,  wie de Mannsen hinner de Weibs’n,  sei a de Koter hinner de Katzen har;  un dodrvu muß iech ämol ä Ding drzehln.  An en wunnerschien Sonntig-Nochmittig soßn mir allezamm in Gartn hinnern Hollunderbaam.
     De Weibs’n stoppetn Strümp’ un mir Manner mahretn e-wing.  Noch ener Weil kame noch e paar Hausleit drzu.  Dobei war a dr Müller-Karl mit seiner Gustl,  die e gruße Vierlieb für allerhand Viechzeich hat.  Heit bracht se e schiens Katzl miet,  dos,  wie e Hund,  an dr Leine giehe mußt.  Off unnre Frog,  worim se dä dos machen tät,  saht se:
     „Do driem in dann Schupp’n is e schwarzer Koter un dar läfft men Mietzl”,  su nanntn se de Katz, „egal hinner har”.
     Weil sich odr dos Tier in dann Halsband net wuhlfiehlet,  hot’s su lang gamaunkt,   bis endlich eens dann Rieme obmachet.   Doch kaum lief de Katz frei rim,  war dr Koter schieh do.  Dr Karl wollt ne nu mit ener Kinnerspritz vrtreibn,  do dos odr nischt nitzen tat,  stand’r auf,  hulet ene Gießkann voll Wasser,  un bei dr erschtn,  bestn Gelanghät kriechet dar Liebhaber e kalte Tusch.  Odr su schnell war dann seine Lieb nett ohgekiehlt.  Wie’r ne Schrack ieberwundn hot,  schlicht’r schuh wiedr im de Katz rim.
Itze fing dr Karl a mit Holzscheitle ze schmeißn; trof odr nischt.

     E Stick nochn annern flog niebr, un alle drnahm. De Weibs’n hattn lang aufgehärt mitn Stopp’n un passetn bei dr Katzen-Gachd auf. Dodrbei konntn mir ’s Lachen kaum drhalten. Unner Gaacher sah sich nu nooch en nei’n Geschoß im. Do käns mehr bei dr Hand war, ging mei Schwaster in Huf un kam mit en derbn Holzpfohl zerick.
     Wie die zwä Katzn wiedr ämol beisamm’ war’n, packet dr Karl, vor Wut dunkelrut in Gesicht, dann Knippel a un hauet’ne drzwischn. Mir war’n gespannt, ob’s an Traffer gab’n tät.
     Wärklich — — — e gammerlicher Laut war de Antwort für sen Wurf. Siegesgewiß erhub ’r sich. Off ämol wurd’r kasweiß un fing a ze Stottern:
„I— I— nu, du Gruß’ Ugelick, itze hob iech unner Mietzl drschlong”.
Richtig, dr Koter war wag, un de Katz log mausetut in Groß. ’s Gustl fing a ze flesch’ un dr Karl hot machtig gefuttert.
     „Harrschte”, schimpfet ’r, „wänn de mir noch ämol e Viech miet ins Haus brängst, fliechst de naus drmiet; merk dir’sch!”
     Nochert hom se ihr Mietl eigegrobn un sei nauf gegange. Mei Vater odr saht plötzlich: „Vrgreift eich net an fremdn Tier’n, dann ka eich suwas nett passiern.”