|
Dos war es Erschte, wos ich häret, wie ich an de Bushaltestell
nakam, wu e Haufen Weibsen stand, von danne zwee sich unnerhalten
taten.
„Nu meiner erscht...”, sat die aane Fra ze nr annern, un se
machet e paar Aagn dodrbei, daß iech gleich wieder an dan
Krimi denken mußt, dan ich an ne Obnd zevur im Fernsähe gesah
hatt. Un noochert packet se aus: „Dar is mit nischt meh
zefriedn! Denkst de epper, ich ka ne Ardeppeln un Quark
oder billige Laberwurscht vürsetzen? Hast de gedacht! Gagdwurscht
muß ’s sei! Servelatwurscht! Harte Polnische! Owos
annersch...”
De annere Fra schniet ihr de Red o un sat: „Wie meiner! Wie
meiner! De besten Bissen will er! Wos ne net paßt, do guckt dar
gar net hie! Von mir aus... wos tut mer net alles!”
„Do hast de rächt!” sat wieder de erschte, „un am liebsten ne
ganzen Tog draußen rümschwanzln! Wenn mer do net derhinnerhar
is...”
„Wie bei men!” fiel ihr de annere wieder ins Wort. „Aufpassen
möcht mer wie e Heftelmacher! Dos hätt ich emol net gedacht,
daß ich of meine alten Tog noch e sette gruße Wärtschaft mit
ne hobn wür’!”
„Of meine alten Tog!” sat se, un ich gucket mir’sche eweng
nahnder a. Schu deswagn, wall’s es erschte Mol war, daß ich e
Fra von sich aus sogn häret: „Of meine alten Tog.”
Se mocht esu um de sachzig rüm sei. Dos mit de „alten Tog”
war e bißl übertriebn. ’s sollt emende aah bluß haaßen, daß se
schu lang mit ihrn Mah verheirat’t war un daß dar sich’s derweile
ogewöhnt hobn müßt, „ne ganzen Tog draußen rümzeschwanzeln”,
wie se sat. Ober do ging die Unnerhalting dar
beeden schu weiter.
„Nu meiner erscht...”, sat itze de annere Fra wieder. „Neilich
is dar emol zwee Tog überhaupt net eham komme!” „Wos de
net sogst!” sat de annere drauf, un mer sohg ihr’sch richtig a,
wie ihr’sch ze nahnd ging. Un aah ich fing sachte a, mit dan
Weibsen mietzufühln. Ich sohg dan Luhmich von Mah esu
richtig vür mir: War waß, wan er alles getroffen hatt, un wie se
noochert, mer waß doch, wie’s de Manns’n e mannichmol su
machen...
Ober ich kam net derzu, mir die Geschichte bis in de Aanzelhäten
auszemoln. Dä es kam noch viel schlimmer, wie’s schu
war. Aah de annern Leit, die miet an der Bushaltestell standen,
horcheten bluß noch of dos, wos die zwee Weibsn derzöhleten.
„Un meiner wieder”, sat nu die, die gerode „Wos de net sogst!”
gesat hatt, „dar macht erscht Zeich! Dar muß wasterhole e su
wos wie garschtige Tog hobn! Do is er net auszestiehe! Do ka
sich kaans ze uns ins Haus getraue! Do möcht mer sich salber
vür ne in acht namme!”
Itze hatt ich miech am liebsten neigemengt un gesat, daß se
dos wuhl wür’ emol der Polezei malden müssen... eh’ ewos
passiert, dacht ich.
Es war gut, daß ich nischt gesat hob. Der Bus kam vorne um de
Stroßeneck rüm, un die beeden Weibsn taten sich vonenanner
verabschieden. Bluß die aane wollt mit ne Bus wagfahrn.
„Wenn de wieder mol nooch Zwicke nunner fährst un ne stutzen
läßt - meiner muß aah wieder mol reneviert wardn -
noochert sog mir’sch fei!” sat se, eh’ se nei in be Bus stieg, ze
ihrer Freindin.
„Ha, ha”, sat die. „Noochert fahr’n mir mitenanner...” Un mir
ging endlich e Lichtel auf: Daß die gar net von ihre Mannsn
gered’t hatten, sonnern...
Un dan annern, die dan Dischkur von dan zwee Weibsn aah
miet gehärt hatten, emende aah. Dos haaßt, wenn se Beschäd
wissen, wos alles in su en Hundesalong in Zwicke, un wu’s die
überol gibt, gemacht ward!
|
