|
mr könnt aah sogn „dr Heiner in Aktiu”. Daar alte Gauner hot
naamlich egal mol de Lachmuskeln dr Dorfleit bewegt oder zemindst
wos drkarrt, wos noochert de Schmunzelrund’ durchs Örtl machet.
Kurz vür dr Hiebeer-Ernt’ in senn Schrebergartn maanet’r mol
ze seiner Gertrud: „Platt mr när heit mei weißes Chemisettl
bissl miet durch, iech muß morgn zenn Dokter.” Verwunnert
freget de Fraa: „Wos willst da du benn Dokter? Du bist doch
munner wie e Fischl!”
„Frog mr kaa Loch nein Bauch, iech muß aabn mol hie, basta”,
war de Antwort. Un wenn dr Heiner ‚basta‘ sat, wollt’r kaa
Widerpart meh härn. An annern Morgn hot siech dr Dokter
über dan saltene Besuch gefrat un freget leitsaalig: „Na, wo
fehlt’s unserem rüstigen Unruheständler?” „überol un nirgends,
guckn Se när mol nooch”, war de Antwort. Do mußt dr
Patient halbnackit of dr Pritsch, un de Unnersuchings-Prozedur
nohm senn Laaf. Wu alles beschnabert un befischpert,
ogekloppt un ogehorcht war, schüttlet dr drfahrene Mediziner
ne Kopp un mufflet noochdenklich: „Ich kann beim bestn
Willn nichts findn.” Un wu schließlich benn Blutdruck- und
Pulsmassen gute 140 ze 80 un 76 rauskame, recket dr Dokter
ne Heiner de Hand hie un sat zefriedn: „Herzlichen Glückwunsch,
alter Recke, Sie sind kerngesund!” Dr Heiner bedankte
sich for dr gutn Nochricht un lachet retur: „Dos wußt
iech vornewag, Herr Doktor.” Do war dr Weißkittel stännig,
un voller Bussit kam’s aus’n raus: „Und da lassen Sie eine so
gründliche Untersuchung zu?” Dr Heiner: „Nischt for ugut,
Herr Dokter, aagntlich wollt iech aah bluß wissen, eb Se heier
wieder paar Kärble Hiebeer vun uns hobn möchtn. Un do
dacht iech aabn, aa Hand wäscht de annere. War mir ewos
okaaft, dan muß iech doch aah wos ze verdiene gaabn.”
Dr Dokter war versöhnt, dr Heiner hot senn Hiebeer-Auftrog
kriegt, un die beedn sei in alter Freindschaft geschiedn.
Dosmol hot oder kaans in Dorf ewos drfahrn, sist hätt emende
de Krankenkass noch Quaarspaa gemacht waagn dr Bezohling
dr Dokter-Rachning. Un zenn Salberschtbezohln halt dr Heiner
waß dr Huhle kaa Lust.
|
