Unner Mad mog su Stücker fünf, sechs Gaahrle of ihrn klenn Buckele gehatt hobn, do fing se an enn Morgn of aamol ah, staawaachmachet ze leiern. In ihrn Hals tat’s maa benn Schluckn su stachn, lametieret se. Wu mei Fraa noochgucket, sooch se enn feierrutn Schlunk un maanet besorgt: „Do müßn mr gelei wos unnernamme, Kind. Mit settn Manneln is net zu spaßen.”

De Christine krieget enn warme Schal, nageraadelt, un fort ging’s zenn Dokter Reitz, unnern Mediziner in dr Bücke. Daar hot erseht e wing mit dr Klenn gegadert, langet nort nooch senn Zung-no-druck-Hölzl un sat freindlich: „Nu schön auf mit dem Scheunentor! Mal sehen, wie’s da drinnen ausschaut.”

Wos itze folgn tat, war nu alles annere wie eigeplant: Dos Guschl war naamlich verschlossn, un zwar eisern. Dr Onkel Dokter kunnt siech is Maul fransit balawern, is war nischt ze machn, de Schei blieb zu! Aah de Mutt prowieret ihr Gelück, doch vergaabns. Dos klaane Luder prasset de Lippn zamm, als hing ihr bissl Laabn drvu oh. Schließlich wur ne Dokter die Sach ze dumm. Er ließ enn Raaflerts fahrn. Umesist. Unner Mad fing bluß ah, vür Bammel ze zufern.

Nu dachtn de zwee Grußn, mit Forsche zenn Ziel ze kumme. Mei Fraa mußt ihr Christi haltn, un dr Dokter wollt mit’n Hölzl dos Sorgnguschl aufstochern. Do wur’sch oder volkerscht haarig. Dos klaane Ding bläket wie e uzeitigs Kalb, rutschet vun Stuhl, ließ siech of dr Diel bauzn un stramplet mit alle Viere su noochhaltig, doß siech kaans nagetrauet. De Unnersuching wur dodraufhie ogebrochn, un is Rappeln nohm e End.

Ofn Hamwaag, wu de Mad immer noch in aane wag dr Bock aufstußn tat, hot se noochert ihr uschulligs Herzl ausgeschult’: „lech ho miech doch su geekelt! Is hot net viel gefaahlt, un iech hätt gespeit; da dos Hölzl, wos dr Doktor bei alln Leitn nimmt, wollt’r aah mir nei’s Maul steckn. Su e Hacksch!”