oß a Klaaner nischt wull’n ka,  mog’s bissel Geschäft sei,  wie’s will,  trifft überol zu,  wenn’s aah noch Leit gibt,  die’s net racht gelaam wull’n.  Wie viel fuhr’n früher sette Handwaagler vun dr Grenz mit Reisigbündeln („Kaufmannsdiener” saht mer när) un klaagemachten Holz rei nooch dr Stadt.  Itze fahrn bluß noch aanzelne,  waar sich kenn Ochs oder a Pfaarl kaafen kunnt,  hot aufgehärt mit daare Hannelei.  Wie hoom sich müssen die Leit ozerr’n,  die net amol en Hund hatten,  se hoom aafach de Fraa mit ahgespannt.  Sette arme Ludersch war’n aah dr Gust un sei Hanne.  Früh in dr neinten Stund war’n se schie in dr Stadt;  do hieß’s ball aufstiehe,  drei Stunden Waag hatten se,  wenn se wullten noochmittig ümme dreie wieder drham sei,  doß se kunnten off ne annern Tog wieder ahrichten un aufloden, mußten se sich tüchtig drzu halten.

Ober a paar Mol hatten se Schaarerei.  Eenes Tog’s war’n se racht ball fartig wur’n,  un weil dr Gust gerod senn Geburtstog hatt,  war ar a paar mol eigekehrt,  un hatt sich su en klenn Stüber ahgetrunken.  Wie nu dos asu kimmt,  in senner feichtfröhling Laune fängt dr Gust doch ah ze singe.  Wie’s nu in dr Stadt is,  hot ar darfen net lang singe,  do hatt’ ne de Polizei ben Wickel.  Sufort wur ar off de Wach geschafft, do hoom s’n erscht a wing ausschlofen lossen,  noochhaar kam’s Verhär.  De Geschicht sullt net asu aafach sei,  denn dr Gust hatt’ unner annern mit gesunge:  „Mir braung keinen König meh!”  Wie ar dorüber ze Red gestellt wur,  hot ar ober geleich gesaht:  „Dos is doch aah wahr!  Mir hoom doch schie enn!”  Asu war nischt off’ne ze brenge,  un se mußten ne wieder laafen lossen.

Dos annere Mol sei se mitenanner off’n Hamwaag;  do kimmt ne feine Kutsch gefahr’n,  dr Gust weicht mit senn Waagel aah racht schie aus,  do hält off aamol de Kutsch ah,  daar feine Harr,  daar drinne soß,  steigt aus un spricht zun Gust:  „Wo haben Sie Ihr Wagenschild?  Sie müssen ein Schild am Wagen haben,  sonst werden Sie bestraft!”  „Nu, nu,” saht dr Gust,  när sachte,  „Sie hoom doch aah kaa Schild an Ihr’n Fuhrwark!  Waar sei se dä aangtlich,  doß se mich asu ahnamme?” „Ich bin der Herr Amtshauptmann.  Ich brauche kein Schild;  bei mir ist’s eine Luftfuhre!”
        Nooch daare Red vun dan fein Harrn hot sich dr Gust ober lossen net verblüffen;  ar hot sich ümgedreht un zu seiner Fraa gesaht:  „Hanne,  setz dich auf!  Mer machen aah ene Luftfuhr’!”  Un fort ging’s,  wos ar när laafen kunnt.

Aus : „’s is fei kaa Lüg”    Annaberg,  Grafers Verlag 1911,  Heft 28

bearbeitet von pks