|
Ben Haase Franz in Aue, daar sei Schusterwerkstatt zamst Laadl an hinnern Bahübergang of dr Reichsstroß hatt, kunnt mr net bluß alte Quantn reperiern lossn, sunnern aah neies Schuh- un Pantofflzeich kriegn. Su viel Auswahl wie ben Uri gob’s bei ne zwar net, doch wos’r führn tat, war gut. Un hanneln kunnt mr aah! Dos hot bei arme Leitn gezugn. Un wal mei Mutter dr Maaning war, doß aaner, daar siech merschtns mit laweedn Latschn rümplogn un dodrbei viel Drack neifrassn muß, an neier War ewing lechter aah e paar Pfeng verdiene sellt, un wal de Haas Lene kaa Rutscher un Borger war, zehletn mir miet zu de gutn
Kundn.
aniche uvergaßliche Stund ho iech in Franz seiner Warkstatt
of’n Schusterbock zugebracht. Dr Maaster war naamlich e grußer Kinnerfreind un hatt egal e lustigs Geschichtl of Lager, uhne drbei de fleßing Hand ruhe ze lossn.
Kurz vür Ustern 1923 schicket miech nu de Mutter wieder mol zen Haase-Schuster un sat: „Frog när emol ’n Franz, eb’r for dir e Paar schiene Straplezierschuh hot. Mit deine zammgeflicktn Traater kö’mr bei denn Schulafang kenn Staat machn.” Noochert hürtset se wieder zen Kassler ¹), un iech bie mit menn altn Schnellaifer lusgeeiert, Richtung Franz.
aar gucket aah gelei nooch, wu’r mei Aliegn gehärt hatt, ließ mr e paar Paar aprowiern un maanet: „Sog deiner Mutter enn schinn Gruß, un iech hatt e Paar straffe Boxcalfer in deiner Größ do. Kummt oder bal, is gieht itze ziemlich drüber haar in dan
klenn Nummern.”
Bis obnds, wu mei Mutter aus dr Bud ²) kam, hatt iech natülich dan verzwicktn Laadername nimmeh genau gewußt. Un of dr Frog, eb iech ben Schuster gewaasn war, gob iech freidig Auskunft:
„Iech seil dr enn schinn Gruß sogn un dr Franz hatt e Paar
feste Kalbsboxer for mir do. Mr selln oder bal kumme, eh’ se wag
wärn.”
Mei Mutter hatt fix begriffn, zwinseret miech huhnackit ah un lachet retur: „Dos muß e ganz neies Laader sei!”
|
