|
n de letzten Zaah Gahr is in öbern Aarzgebirg de Kunikelzucht richtig in Schwung kumme. Mer braucht net viel Platz drzu, a bissl Holzplatz, wu su a Hüttel drauf gieht, is merschtenteels noch ze hoom. Wie schie is, wenn mer ka dann un wann su a Langohr schlachten, do freit sich de ganze Familie offn Sunntigsbroten, un de Fraa ka de Portione wieder mol uhne Brill austeel’n. Ober ganz asu aafach is de Zucht net, waar immer kräftige Hosen behalten will, muß aah für Blutwachsel besorgt sei. Dovu waar’n aah bei uns drei sette Zuchtfreind überzeigt; se hatten sich doserhalm an en rachten schinn Frühlings-Sonntig off ne Kunikel-Hannel gemacht. „Wißt ihr,” hot dr Kar zu senn Kolleeng gesaht, „wenn iech a paar rachte schiene Black-Hosen krieng ka un net ze teier, bezohl iech a halbs Dutzend Bier.”
De ganzen paar Zuchtfreind in Kinnischwall hoom se besucht, de Hannelei ging aah nooch Wunsch un Wille. Dr Kar hatt’ rachte schiene Black and tan¹) erwischt, als Mann vun Wort hot ar a halbs Dutzend Bier bezohlt. Wie dos nu su zugieht, wu fidele Brüder sitzen, finden sich aah noch welche drzu, ganz besonnersch ober, wenn a wing racht schie gesunge ward. Dr Kar war nu gerode aaner, bei dan off en Tippl Bier zwee Lieder kumme, un miet seiner unermüdling Baßstimme kunnt ar sich aah här’n lossen; seine Kolleeng paßt’n ober aah drzu.
„Mit des Geschickes Mächten ist kein ewiger Bund zu flechten.”
De Wahrheet vun dan Dichterwort sullten aah unnere drei Zuchtfreind an sich salberscht erfahr’n. Über de Singerei un Trinkerei war’sch Noochmittig wur’n. Weil’s nu tüchtig warm war, warn se fruh, wie se in Wald nei kame. Jeder hot sich a racht schie Platzel gesucht, wu ar a wing verschnaufen wullt, un do drbei war’n se eigeschloofen. Dr erschte, daar munter wur, war dr Kar. Weil’s nu schie ne Weile nimmer Tog war, fischt ar noch sen Sackel, wu de Hosen drinne sei sollten, die ober nimmer do war’n; se hattn sich drweil aah ins „Grüne” gemacht. Traurig hot do dr Kar gesunge: „Verlassen, verlassen, verlassen bin ich . . . ” Vun dan Gesang wur aah dr annere Kar munter. Wie daar de Aang aufmacht, scheint’n dr Monden ins Gesicht. Gar feierlich ließ ar desterhalm sei schiene Tenorstimme in Wald nei klinge un sang: „Es blickt so still der Mond mich an . . . ”
Endlich wur aah dr Ward munter. Ben aufspringe haut ar sich en Reißigast ins Gesicht, weil ar ober singe härt, schimpft ar net drüber, im Geenteel, ar singt für lauter Begeistering: „Wer hat dich, du schöner Wald . . . ” Dorch ne Gesang hoom se siech wieder zesammgefunden, un gemeinschaftlich, wie se ausgerückt sei, sei se aah wieder aham. De Blackhosle sei drhalm net verlor’n gange, die sei wieder aufgefunden wur’n.
|
