Kamelharz
oder
salten's Freibankflaasch
          vom Grußvoter aus dr Sehm


          Dr Ott un dr Arth war’n a paar Ulkbrüder mitananner, wie se sich gesucht un aah gefunden hatten.  Vun Professiu war’n  se Meierer.  Wie die nu beisamm off en Bau war’n,  kunnt mer ganz gewiß drauf rachne,  doß wieder amol lustig’s  Luder gebaut wur.


          Eenes schinn Mittogs ward dr Ott awing länger außen sei, wu daar dr erschte immer war;  do frogt dr Kallichtraager ne Arth,  wu dä heit müßt dr Ott su lang sei.  „Inu”,  sogt daar,  „amende is ar erscht amol mit off de Freibank gange,  heit soll’s doch wos ganz Extra’s gaam”.  An dan Noochmittig wur gerode ne alte Kuh verhackt.  Die Rederei ward nu de Nachbern miet ahärn un ne Arth froong,  wos dä Schiens verkack wür?

          Do soogt dar Schalk: „Weßt dä du noch nischt drvu ?  Heit Virmittig is doch en Kameltreiber vun dr Kaath,  daar do naufzu Virstelling gaam hot,  su a gruß Malär passiert.  Dos gruße Kamel is drum ben Danel-Lieb-Schüppel übern Rand neigefall’n un hot sich do drbei sett’n grußen Schoden getae,  doß se dos arme Viech schlachten mußten;  nu ward’s heit noochmittig off dr Freibank verhackt.  Wenn mer en afrikanischen Viehdokter hätten, kunnt’s noch ze retten sei,  de hiesing Dokter hoom leider noch kaa Verstistemich vun en Kamelleiden.”

           Währ’nd nu dr Arth de Neiigkeet drzeehlet,  kimmt dr Ott,  daar hinten reigange war, de Kallertrepp rauf un härret nu die Geschicht miet ah. Dos war nu gerod a gefundnes Frassen für ne.  Miet dr uschuldigsten Miene vun dr Walt tritt ar für un sogt:  „Ober dos is schie Flaasch,  dos Kamelflaasch;   iech Tu’s net bereie,  doß iech ho ne halbe Stund versäumt.”
           „Aah noch Gelück hatt iech,  doß noch a fei wing Harz do war,  geleich 4 Pfund hob iech genumme,  weil bluß a Pfund 20 Pfeng kosten tat.  Heit noochmittig ward’s gebroten,  do könne mer alle offn Bau tüchtig assen.”

Nu hatt’ ober de gute Nachbarsch-Fraa nischt Eiligersch ze tue,  als aah nauf off de Freibank ze giehe.  Wie se nauf kimmt,  frogt se ne Freibankflaascher,  öb dä noch Kamelflaasch do wär. Wos daar nu zur Antwort gaam hot,  weil ar dacht,  se wullt’n uzen,  will iech lieber net drzeehl’n,  gar su schmeichelhaft is net gewaasen.  Wie se ober nu de Geschicht richtig aufrichtig drzeehlt hot,  do hoom de Flaascher un dr Aufschreiber gedacht,  se müssen starm vor Lachen un hoom dare guten Fraa drfür zwee Kilo racht extra schie Flaasch rausgehackt.

           Dr Ott un dr Arth hoom siech dan Tog gar net meeh saahe lossen,  ne annern Tog hoom se ober ihr  „Grüß Gott!”  ze här’n kriegt.

Aus : „’s is fei kaa Lüg”    Annaberg,  Grafers Verlag 1911,  Heft 28


bearbeitet von pks