„Wenn de Kinner klaa sei,  do sei se am schönnsten”,  haast schu ne alte Red,  un die is aa su uracht net.  Dr Dehnert-Friedel kunnt a Liedel drvu singe,  wos ’s Haast,  wenn de Kinner gruß waar’n un ne dr Mutwill in Kopp stackt.

          „Sei Gung,  daar schu ’s sechts Gahr in dr Schul nei off Grüstaadtel gung,  machet ne mannige Koppwüting.  Su a Gung,  wie de Gunge in dan Alter allezamm sei,  machet nu sei Luderei,  wu ar när kunnt.  Bei geder Uart,  die ausgefrassen wur,  war ar immer dr erschte mit drbei,  un alle Tog gob’s neies Lamento un die drzu gehäring Faunzen,  die dar Gung — Karl hieß ar — ball net meh entbehr’n kunnt,  geholfen hamm se ober aah net.

          Off dr annern Seit kunnt dr Friedel aah net asu sei,  denn dar Gung war gutwillig un ahstellig un in dr Schul war ar immer aaner von de gescheitesten un soß,  wenn ar net gerod waang ener Luderei hintenna gesetzt wor’n war,  immer off dr erschten Bank.  Dr aanzige Faahler war aam,  doß ne de Mutwill noch ze sehr in de Husen stok.  En Hauptspoß gob’s ne, wenn ar de Leit aweng mit Froong torbiern kunnt,  un wie olber tot ar sich freie,  wenn de Leit off seine Froong nischt soong kunnten,  noochert wur’n se aah noch ausgelacht.  Aah wenn ar mit senn Vater fortgung,  häret de Frogerei un Torbiererei eitel net auf,  über geden Drack mußt ar genau unnericht’t sei,  annersch gung’s gar net.

          An en schin Sommerohmd machet dr Friedel mit’n Gung übern Barg nüber off de Wies’ zun Heiwenden.  Eene ware Pracht war’sch heit ahzesaah,  wie de Sonn’ in ener grußen ruten Scheib’ hinnern Wald unnerging,  während off dr annern Seit dr Manden, daar itze noch kaasweiß aussooch,  langsam in de Höh machet.

          ”Vater“,  gung geleich de Froogerei lus,  „wu gieht dä itze de Sonn’ hie?”  — „Unner gieht se,  dummer Gung?”  —  Dr Friedel war mei Tog kaa Freind vun grußer Unnerhalting, ar hielt am liebsten sei Betrachting für sich o,  un kam dodrbei vieleicht am besten wag. Doch heit sollt ar kaa Ruh’ krieng.  „Vater!”  gung’s nooch ner Weil wieder lus,  „wu kimmt dä itze dr Manden haar?”  —  „Rauf kimmt ar,  olberner Gung!”  rasselt ne dr Alte ah,  un ene klaane Weil war’sch ruhig,  ball häret mer’sch ober wieder:  „Vater! Worüm sieht mer dä itze de Starn noch net?”  —   Dr Friedel wußt net geleich,  wos ar off die gescheite Frog antworten sollt.  „Dos ka dir egal sei!”  fuhr ar ne zeletzt ah,  när um wos ze soong.  A paar Minuten lang wur kaa Wörtel gered’t ober dar Saugung kunnt,  wie’s schien,  de Gusch doch net halten,  un maanet ganz sachte:  „Vater!”  —  Wetter kam ar itze oder net, denn dr Friedel,  dan die Sach’ doch ze bunt wur,  drehet ne gaalings üm,  sooch ne Gung mit de Aang ah,  als wenn ar ne frassen wollt,  un rasselt ne ah:  „Du werscht geleich a paar rachte gruße Faunzen krieng,  wenn de net ball aufhärscht mit denn egal saudumme: Vater!”

          Dos hot ar nu amende grod aah net soong woll’n!

Aus : „’s is fei kaa Lüg”    Annaberg,  Grafers Verlag 1911,  Heft 28

bearbeitet von pks