De Schwobmale war ofn Gericht gewaasen un hatt’ aah schwär’n müssen. Se hatt’ e paar Nächt virhaar net schlofen känne. Oder die ganze Sach war esu schie gange un wie nu noch volst dr Gerichtsdiener saht, de Zeig’n sollten nunner in dan un dan Zimmer giehe un sich ihr Gald auszohl’n lossen, do war de Male dan ganzen Ding gut.

Se krieget fürn Waag un de Verzehring neinzehn Neigrosch ausgezohlt. De Male war ganz saalig, esu viel konnt se drhem an Klippelstock net verdiene.

Se machet sich noch emol an dan Ma nah, daar ’s Gald ausgezohlt hatt’ un saht ganz haamlich zu ne: „Wissen Se dä, wenn se wieder emol ewos ze schwär’n hob’n, do hul’n Se mich när wieder!”