|
r Schreitoffeltraugott kam ganz außern Heisel aus dr Kerch’nvirstandssitzung eham. Sei Mine market geleich, daß ewus lus war, se wußt när net wos. Dreimol setzt er ah un wollt’s derzähl’n, oder er lief allemol rut un blaah ah un bracht kä Wort raus. „Nu, wos söll de dos Gemurks?” fing endlich de Mine ah. Dr Traugott setzet noch emol ah un endlich bracht’r’sch raus: „Se hob’n mich heit zun Kerch’nvoter gewehlt!”
Dr Mine blieb fast dr Verstand stiehe. „Wos”, saht se, „su en alt’n Talken wie dich wähl’n se zun Kerch’nvoter? — Na, dos will ich dir sog’n: käne zah Pfaar bränge mich in de Kerch, wenn du mit’n Klengelbeitel drinerümsappst! Dos is net esu lecht, wie du denkst! Vorne stichst de ne Leiten dein Klengelbeitel in Gesicht, un hint’n rammelst de mit’n Stack’n in de Fanster nei! Dos ward e schie biss’l Harzelaad waarn"”
e Traugott fuhl geleich ’s Harz in de Laaderhus. Se hatt’ net uracht, sei Mine. Die Klengelbeitelsach war ’ne aah net racht geheier. Sinst, ’s Taufkannel trog’n un in Kerch’nvoterstuhl sitzen, dos moch alles sei. „Na, weßt de,” saht er, „’s möcht doch alles gelarnt sei, iech waar dos ah larne!”
An annern Tog früh üm sieb’n machet er sich nauf of’n Heibuden. ’s Gung’l vun seiner grußen Mad war komme und lief’n of Schritt un Tritt ennoch. Dr Traugott tat nu senn Gung’l alles derklär’n. „Siehst de,” saht er, „dos is de Kerch!” Dann nahm er en Rachenstiel un tat an öbern End e Zippelmütz nabind’n. „Dos is dr Klengelbeitel!” ’s Gung’l passet racht adächtig auf. Dos wußt aah schie, daß in dr Kerch de Weibsen unten in Bänken sitzen un de Mannsen ub’n ofn Chor. Dr Traugotttat nu, als ging er mit senn Klengelbeitel von en zun annern, un lief Schritt für Schritt ofn Heibuden hie. Wie er nu su vun ugefaahr an dr Budenluck nakam, werd er doch ’s Trompetel versaahe, un sterzt samt senn Klengelbeitel nonner in Stall.
n dan Aangblick werd doch de Mine de Trepp raufkomme. Wie se nu ne Traugott nimmer saahe tat, freget se geleich dos Gun’l: „Daß Gott derbarm, wu is dä dei Grußvoter hie?” „Daar is nunner bei de Weibsen gange!”, saht dos Gung’l, als wenn gar nischt gewaasen wär.
|
