|
enn mer dos Feierlöschwasen itze ahsieht un bedenkt, wie’s früher war, do markt mer erscht dan grußen Unnerschied. Itze sieht mer Spritzen, die ginne Himmelhuch, se sei aah net asu schwär, zwee Leit reißen dermit aus, als wär’sch gar nischt. Wasser ward aah geleich neigeplumpt; dozemol ober mußten mer schöppen, un wenn’s kalt war, hot mer a mannigmol ball de Finger derfror’n. Itze gibt’s richt’ge Feierwehrkompenien, de Leit hoom Uneform, blitzblanke Helm auf, gerod wie bei de Soldaten. Dos gob’s früher net, ober Leit gob’s aah, die’s Harz uffn rachten Flack hatten, dan’s off a biss’l Waag net ahkam.
o war aaner bei uns, se hießen ne när ’n Schusterlieb. Als gunger Karl war ar schie bei dr Löschmannschaft gewaasen, wie’s dozemol bei uns hieß. War nu irgen amol wu Feier, dr Lieb war immer aaner dr erschten, wenn’s net gar ze weit war, un wenn noch wos ze löschen oder ze retten war, warsch a asu. Sugar a paar Wasserkübeln hatt’ ar sich für seine Gunge salberscht gemacht, wu a biss’l wos nei ging.
n Ort war nu lang schie kaa Feier gewaasen, bis amol an en rachten schinn Ohmd enne Rieting an Himmel wur, doß mer dacht, ganz Kinnischwall tät brinne. Do saht dr Lieb: „Kommt, Gunge, itze ward ausgerück, nammt geds eiern Kübel, macht’n när geleich voll Wasser, doß mer keene Wertschaft hoom, wenn mer hiekomme.” Nu wur geleich beim Kommunwald nausgemacht, laafen konnt’n se alle dreie wie de Reh’. Wie se ober off dr Höh’ war’n, sahe se erscht, doß dos Feier net in Kinnischwall, ober in Milnaa war. Do maanet dr Lieb: „Wist’r wos, Gunge, sei mer amol bis dohaar, blebbt sich’s geleich, mer machen aah nüber nooch Milnaa, dos kimmt off eener halben Stund Waag net aah!”
u ging ober dos Renne wieder lus, off aamol purzelt dr Klaane, dr Gruße fällt off’n Klenn drauf, nu dos ganze Wasser aus de Kübeln laaft ne Faldwag nei. Do is dr Lieb ball verückt wur’n, vor lauter Wut hot ar sei Wasser aah ausgeschütt un geschrie’n, doß se’s wie weit här’n konnten: „Ihr daamischen, ihr talketten Gunge, nu könne mer när geleich wieder ümkehr’n, wos wull’n mer dä in Milnaa uhne Wasser?” Ganz betrübt sei se aham gange, dosmol war ne de ganze Geschicht ze Wasser wur’n.
|
