|
Ben Haaßlergust war heier e schlacht’s Weihnacht’n. Sei Fraa log schie seit sechs Wochen ofn Tud un ar salberscht hatt sich in dr Hammerschmied ne Arm gottegar verbrannt, doß er’n schie seit’n Donnerstog in dr Bind troong mußt. Wie hatt’n se sich dos ganze Gahr of dan heiling Christ gefrät! Dr kläne Paul war nu drei Gahr un wur schie ewing verstännig. Für dann sollt nu e schiens Baam’l ahgeputzt warn un e Pfaar sollt er krieng un e richting Woong, ne ganz’n Sommer hatt ’s de Red d’rvu gaab’n. Wenn dar kläne Gung e Waag’l hob’n wollt, saht när allemol sei Mutter: „Mußt racht gut folg’n emende brengt dir dr Rupperich äs!”
Un ’s war nu ganz annersch komme. Die Krankhät von dr Anna! Die paar Sparpfeng war’n wag wie nischt un do war aah noch net emol alles bezohlt. Un ’s möcht noch sei, wenn när dr Gust emol gemarkt hätt, daß de Krankhät nochließ, nä, mit dr Anna wursch immer winger, dr Dokter soget schie gar nischt meh d’rzu. Die Grühaner Fraa hatt’ aah nischt geholf’n un dr Haßlergust hatt’ sich ball drei ergaab’n, daß ar sei Anna haargab’n mußt. Nu war dos aah noch mit senn Arm komme. Die paar Mark von dr Krankankass’ langeten doch hint’n un vorne net.
Wie er heit dos Gald gehult hatt, war er unnerwags ben Nodlerfranz verbei komme. Un do hatt’ er senn Paul en Pfafferkuch’nengel mietgenomme, daß när dos Gung’l aah ewos hob’n sollt. Wie er ehem kam, bauet dr Gung vir’n Haus in Schnee rüm. Dr Gust freeget: „Nu, war dä dr Harr Dokter do?” Dr Gung saaht: „Naa, net!” Un dann rannt er schie üm senn Vater rüm, dä er hatt’ dos Packel mit ’n Engel geleich gesaah. Dr Gust machet nu racht schie sachte nei in dr Stub un setzet sich zu seiner Anna ans Bett. Die schlief un rühret sich net, ene Hand hatt’ se zun Bett raushänge, un die nahm dr Gust in sei Hand.
Nu mußt er an su mannigs denken.
Kaum vier Gahr war’n se nu beisamme. Un die schiene Zeit! De Anna war gar net esu wie annere Weiber. In dr Stub sochs net aus, wie bei en Hammerschmied. De Anna konnt haakeln un stricken un war esu gelambrig mit de Händ. ’s hatt’ alles Geschick un Ahsaahe, wos se machet. Derbei hatt’ se noch Gorl genäht von zeiting Morg’n bis in de Nacht nei. Wie nu dann dos Gungel komme war, wie hätt’se dann klenn Karl rausgeputzt! Aus alten Gelump wur’n noch Klaadle un Husen zerachtgeschneidert un de Leit hatt’n schie alle gesaht, dos Gungel söch mer när gern ah! Un drbei war’sche net epper ub’naus gewaasen! Wos die annern Weiber für Staat vertrödeln taten, dos machet sich de Anna alles salber. Un aah dr Gust war annersch gewur’n. Dr Gasthuf konnt’n net meh ziehe, un wenn er emol sei Tipp’l Bier trank, do market er richtig, wie garn de Leit mit streite taten, un e jeds setzet sich miet zu ne na, aah wos de paar Gruß’n in Dorf war’n. Wenn aah de annern Hammerschmied ’s luse Maul über’n hatten, er kehret sich net dra, dä er hatt schie lang weiskriegt, wie er of daarer Art dr Gescheitere war.
Un wie hatt’ sich dos verännert! Die biese Krankhät! Un nu sollt epper noch sei Anna starb’n müssen? Wie er dos dacht, do lief’n Gust ’s Wasser när esu über’n Gesicht wag. Un do kam aah geleich dr kläne Gung reigestörmt un schrier, daß de Anna geleich aufwecket: „Vater, oder ’n Besserboß ho ich itze en grußen Batzen nagehaa!’ Of emol sooch er, daß sei Vater heilet. Ganz klälaut saht er: „Vater de heilst doch; waar hot dir dä wos geta?” Dr Gust wischet sich schnell de Aang, oder de Anna hatt’s doch aah schie gesaah un schtreichelt’n när de Händ. Dr Gust fing ball ah, sich ze schaame, un er nahm geleich dos Packel mit dan Engel, gob’s senn Gunel un saht när: „Dos is dei heiliger Christ!”
Der Gung dos Packel aufreißen un schreie: „Ach, daar schiene Ma! Daar hot doch Flügel? Is dos dar heilige Christ, Vater? När esu schie! Un aah e richtigs Gesicht hot er! Dan aß ich net geleich! Saah när emol, Mutter, dos schiene Mann’l!” Er machet sich nu na ans Bett un zeiget seiner Mutter dan grußarting heiling Christ. De Anna hat schie lang net mit ihr’n Gungel gestriet’n, emol war’sche ze schwach, annermol hatt’ se kaa Lust, ’s war er alles esu egal wur’n. Oder itze nahm se doch ne Paul senn Pfafferkuch’nmaa haar un saaht: „Siehste, mei Gung’l, dos is e Engel.” Dr Paul freeget geleich: „Wu sei de die d’rham?” Un nu hot’n de Anna derzählt, wos se alles von de Engel wußt. Zeletzt saht se när noch: „Ach Gott, emende bie ich morg’n aah schie e Engel!” Ne August lief’s Wasser när esu aus’n Aang. Dr Kläne hatt’ sich mit senn Engel benn Bett ofn Buden gesetzt un gucket senn heiling Christ ah.
Of emol stand er auf, ging zu seiner Mutter un saht: „Weßte, Mutter, waar lieber kä settiger Engel! Emende krieget dich e racht uartiger Boß zum heiling Christ, un daar tät dich geleich an erschten Tog zerbrach’n!” Do mußt de Anna doch ewing lachen, un aah dr Gust verzug’s Gesicht, ’s ging gar net meh racht, er hatt’ in daarer Zeit ’s Lachen ball verlarnt. De Anna schlief oder wieder ei, un menn Haßlergust war, als wenn se lang net esu ruhig geschlofen hätt. Er dacht schie: „Söllt’s epper möglich sei, daß mer mei Anna an Laab’n blieb?”
Un wie nu dr Dokter kam un se ahsooch, mänet er: „Na, Häßler, sie ist über’n Berg, Eure Anna wird wieder gesund!” Do stützet dr Haaßlergust senn Kopp of de Händ un schaamet sich net, daßn de Träne när esu loffen. Un der kläne Gung soß in seiner Eck, hatt’ senn Engel de Flügeln ogebrochen un stecket se nei ins Maul!
|
