r Schneiderlieb war ’ne alte gute Haut.  Wenn ar kunnt jemand wos ze Gefall’n tue,  hot er’sch garn getae.  Aufreging kam bei ’ne su lecht net für, wos ar ober für senn Tud net leiden kunnt,  dos war,  wenn eener racht mit dr Peitsch knall’n tat.  Wenn ar sich aah fürgenumme hatt’,  sich net ze argern, kunnt er’sch ober net verwinden.

                     Vor vielen Gahr’n war ar amol in Weipert ben Pfeifen-Uhlig gewaasen,  wu ar sich ’ne rachte schiene Porzellie-Pfeif,  mit en Köppel,  wu dr Stülpner-Karl drauf war, gekaaft hatt’.  Wie ar bei dr Apthek läft,  sieht ar mit liebevull’n Blicken sei neie Pfeif ah; do knallt off amol a Fuhrma a su kräftig hinner’n, doß ar für lauter Schrack de Pfeif fall’n läßt,  un wos Ugelück will,  dos neie Pfeifenköppel war in lauter Stücken gange.  Wie ar sich halbwaags wieder drhult hatt’,  is ar noch amol ümgekehrt un hot en annern Pfeifenkopp gekaaft;  gar ze garn hätt ar enn mit ’ne Stülpner gehatt,  ober die war’n alle. Seit dare Zeit kunnt ar de Peitschenknallerei net drhär’n.


Wie’s nu überol Ludersch-Gunge gibt,  su warn aah ne Lieb seine Nachbarn vun daare Sorte net ze wenig geglückt.  Su nooch un nooch war’n de Bengeln drhinner komme,  doß dr Lieb Peitschenknall’n net härn kunnt.  Nu hatt ar aah noch dan Faahler gemacht,  un su en huhtueden Knaller sei Hinnerteel tüchtig ausgekloppt.  Do hatt ar ober erscht ins Wespennast gesterlt.  Ohmd für Ohmd kam a su a Haardel Gunge un taten bei ne für dr Haustür knall’n,  mannigmol is ar ball verrück wur’n,  wos ne ober alles nischt half.  Kaa setter Bengel ließ sich noch amol drwischen.

                   Stundenlang hot ar drüber noochgesunne,  wie ar sich Ruh verschaffen kunnt, uhne wos ausfindig ze machen.  Do kimmt an en rachten schinn Juni-Ohmd — de Knallerei war geleich erscht wieder amol virbei — amol dr Potvetter aus Neidorf vorbei.  Dan klogt dr Lieb sei Nut.  Un nu gob ne daar en Rot,  daar unnern Lieb aah gefuhl.  Ne annern Ohmd kumme de Gunge wieder,  un’s Knall’n ging wieder lus.  Do gieht dr Lieb ruhig naus,  legt 20 Pfeng offn Hackklotz hie un saht ze de Gunge:  „Wenn ihr morg’n noch amol a su viel Gunge seid un knallt noch amol lauter,  kriegt ihr 40 Pfeng.


o hoom de Gunge gedacht,  dr Lieb is übergeschnappt,  weil ar ober noch amol saht, se söllt’n fei kumme,  hoom se aah gedacht,  ar meent’s orntlich.  Ne annern Ohmd kam ober a Haard ahgerückt,  un geknallt wur wie olbern.  Dr Lieb hot sich sot Waat in de Ohr’n gestoppt un dos Theather ruhig enne Viertelstund giehe lossen.  Nochhaar is ar naus un hot zu de Gunge gesaht: „Heit hatt ihr net asu schie laut geknallt,  wie gestern, doshalm könnt ihr när 15 Pfeng krieng.”

                    Do hatt ersch ober schie bei etlichen Gunge versaut.  Ne dritten Ohmd kame bluß noch de Hälft,  do hoom se gar när 5 Pfeng kriegt.  Ne vierten Ohmd kame när noch ne geizing Heisel-Fritz seine vier Gunge,  die hoom sich über ne Stund ogeplogt un geknallt, wos när ’s Zeig hielt.  Waar sich ober gar net saahe ließ,  doß war mei Schneiderlieb.  Do wur’n ober de Gunge wichsig,  dr Gruße hot geschriern: „Dengste dä,  mir knall’n ümmesist, du Geizhalz! Mir kumme gar nimmer haar,  un dan annern Gunge war ich’s aah sahe,  kast dich geleich versehne!”¹)