’s  Borng  is  a  arnsts,   mitunner  aa  a  spaßigs  Kapitel  in  Laam.   In  dr  itzing  Zeit  kimmt’s  Borng  immermeh  o;  ’s  getraue  sich  doch  viele  nett,   vun  ihrn  Nachbar  Zeig  za  borng  un  epper  gar  hiezarichtn,  wos  gar  nett  wieder  aageschafft  warn  kaa.   Do  warsch  früher  annersch.   Wos  wur  do  nett  alles  geborgt!   ’s  ging  richtig  na  Gahreszeiten  nooch.   Ben  Ardöppeleng  wur  dr  Laafkarrn  un  da  Miestgabel,   ben  Heimachen  ’s  Dengelzeig  un  dr  Rachen,  ben  Krauteinschneiden  dr  Krautstamper,   un  in  Winter  ben  Stöckhuln  dr  Handschlietn  geborgt.

 a  in  Haus,   unnern  Stubnnachbarn  wur  allerhand  geborgt.   Do  borget  dr  Henner  vun  Kaar  a  Hanfeie  Tobak,   da  Ernstine  vun dr  Marie  a  Nappel  Salz  odr  18  Kaffeebunne  zu  enr  zweemannischen  Kann  Kaffee.   Obr  an Traffer  in  Borng  hoot’s  Günnel-Christel  gemacht.  Kimmts  an  Mantig  virmittig  nei  zun  Schneider-Fritz’l  und  schießt  lus:  „Jtze  hoo  iech  mei  biss’l  Wesch  eigewaacht  und  will  sa  raus  waschen,   denk  dor  när,   hoo  ich  ka  biss’l Saaf  drhamm.   Willst  du  dä  net  a  su  gut  sei  un  mir  deine  a  mol  borng,  kast’s  gelaam,   iech  tu  dr  kan  Schod’n  draa."

 ’s  schlachtste Borng  is’s  Borng  vun  Gald.   Dan  Wag  gieht  mr  när,   wenn  mr  kann  Auswag  meh  waß.   ’s  Schlimmste  is  allemol  da  Eileiting.   Do  sitzen  manniche  und  mahrn  war  waß  wie  lang  vun  allen  Mögling.   Zaärst  kimmt’s  Watter  dra,   ’s  Watter  vun  heit,   vun  gestern,   vun  vurgestern,   sugar  vun  vuring  Gahr.  Noochert  kimmt  da  Red  off’n  Weigelt-Schuster  sei  Öchsel,  off’n  Löbelt-Schneider  sei  Zieg,   off’n  Freitag-Beck  seine  gruße  Maad,  när  offs  Borng  komma sa  nett.   Su  kimmt’s,   daß  bei  manning  aus’n  Bornggieh  när  a  Hutzengieh  ward.   „Jech  komm  a  annermol  wieder”,   is’s  letzte  Wort.   Do  hatt  a  ganz  annersch  Geschick,   offs  „Thema”  za  komma,   da  Richter-Gett.   Darer  ihr  Maa  hat  da  Woch  über  ze  kassiern,   un  an  Suntig  zammzarachne,  un  an  Mantig  mußt  da  Gett  allemol ’s  „Defizit”  decken.   Ihr  Nuthalfer  war  da  Schubert-Male.   Die  wußt  schu,   wos  da  Gett  wollt,   wenn  sa  an  Mantig  zor  Tür  reitraat,   när  neigierig  war  se  allemol  off  er  Eileiting,   die  da  Gett  machen  wärd.

 n  erschten  Mantig  kam  sa  a  bissl  usicher  in  ihrn  Wasen  rei,  but  an  schin  guten  Morng  un  setzet  sich.   „Male”,   saht  se  noochert,   „in  der  Bibel  stieht:  Der  Gottlose  borget  und  bezahlet   nicht!   Kast  de  dä  a  su  wos  vun  mir  denken?   Naa,  wos  iech  borg,   bezohl  iech  bei  Haller  un  Pfäng  zarück.   Du  bist  doch  a  su  gut  un  borgst  mr  bis  über  8  Tog  100  Mark?”  Da  Male  war  a  su  gut.  An  nächsten  Mantig  kam  da  Gett  wieder,  in  aner  Hand  na  Hunertmarkschei,   in  dr  annern  a  Worscht,   die  pfaffert  sä  hie  offn  Tisch  un  saht:  „Male,   den Draschflegel  gab  iech  dir  als  Zinsen.   Obr  dan  Hunertmarkschei kaa  iech  mir  doch  wiedr  off  8  Tog  mietnamma?”   Ja,   sa  durftn  wiedr  mitnamma.

Aus :  GLÜCKAUF,  anno 1988 N° 4

bearbeitet von pks