|
Unner'enanner sei mier Arzgebirger alle freindlich, ober ah manningtsmool huhnaggit.
Mir hatt’n im Dorf zwee unnerschiedlich gruße Amtspersohne ne „Manns” un ne „Ott”.
Wie se sich nu gerod Gedank’n ieber dan neie Tog machett’n kam dr „Sander” in de Amtsstub un wollt ne Ahzeich mach’n. Dr Ott tat geleich beschäftich’t, su ging dr Sander ne Manns’ ah mit sen Ahling.
Wie ar nu all’s drzeelt hat, wie ne dr Christbaam gemaust wurn is, saht dr Manns’: „Dos is ober ah e’wing struhdumm ne Baam e’fach hinnern Schupp’n ze stell’n. Ihm tät suwos net passiern, seine Tann wär im Wassertrog eigefrorn”.
Dr Sander tat när mit’n Kopp schütteln, ieber dare hilfreiche Ahsicht dr Obrichkeet, un schlürfet drfu’.
Zwee Toog dr’nooch ging dr Manns’ in sen Garten, umm de Tann’ aus’n Eis ze befreie, un wollt senne Aag’n net gelam wosser do fand.
In dare Tonn stoog e’ Knipp’l mit’n Zettel drah wurauf geschrieb’n stand: „Du bist e Polizeityrann, du brauchst en Arsch un kaane Tann!”
Nu war dr Manns’ ober su’ off dr Palm, dos ar de Schindludertat uhbedingt aufklär’n un dan Uhholt greif’n wollt.
Ar ging nu ieberol do hie, wu ne Schreibmaschin stand, un liess sich vun de Sekretärinne unner ah Ahdrohung dr Verschwieg’nhäät den Text schreim, um dan Uhholt ze drwisch’n.
Wos soll iech eich grus soog’n: Manche Sekretärinne konnt’n de Gusch net halt’n, wudurch ah iech dos wess.
Un dr Manns’ hoot dan Uhholt ah net drwischt, do ar vun senner eichne Amtsschreibmaschine keene Prob genumme hat.
|
