De  aafachsten  Menschen  warn  mir  meitog  de  liebsten   Menschen.  Dos  ka  iech  aus  men  Labn  sogn;   denn  iech  ho  de  Menschen  ewing  kenne  gelarnt.   Dos  sei  ubn  bei  uns  de  Waldleit  un  de  Fuhrleit.   Früh  bezeiten  ginne  se  mit  ihm  Huckreff,   dr  Saag  un  dr  Hack  of  ihr  Arbit  in  Wald.   Se  reden  alle  noch,   wie  ihre  Mutter  sproch  un  esu,   wie’s  geden  ausn  Harzen  kimmt.   Do  is  kaa  Schminkerle  Tuerei  un  Afferei  derbei  un  kaa  Eigebildheit.   Ja,   iech  muß  sogn,   aah  kaa  Lüg.  Drum  fühlt  mr  sich  unner  settige  Leit  geleich  wie  derham.

Do  kumme  se  dr  Reihe  nooch  in  dr  fümften  Stund  ausn  Revier, un  iech  traff  mich  mit  se  of  e  Stündl  in  dr  Waldschenk  ben Max,   dos  aah  esu  e  echter  Arzgebirger  is.   Do  is  dr  Färschter,  e  langer,   schmoler  Dingerich  su  in  dr  Dreißig  rüm.   Ar  redt  net  viel,   odr  wos  ar  sogt,   hot  Hand  un  Fuß,   un  ar  verstiht  sei  Fach.   Wenn  de  Zither  ofn  Tisch  stiht,   grefft  ar  geleich  nei  un  spielt  aans.   Un  do  kumme  dr  Hah  Will  un  dr  Hah  Kort  un  dr  Leistner  Max.   Allis  Kerln  an  dr  Sachzig  un  Sibbzig  na.  Se  kumme  vun  dr  Arbit.   Se  hamm’s  itze  lechter  als  früher.  Dos  spürn  se.   Do  mußt  allis  mit  dr  Hand  gemacht  wern.  Schneid  när  emol  su  e  Ficht  mit  en  achtziger  Dorchmasser  mit  dr  Schrutsag.   Dos  pfefft  in  dr  Lung  un  ruppt  in  de  Muskeln.  Un  dos  allis  bei  Wind  un Watter,   Storm un  Schnee.   Ja,   su  war’sch.

  Ober  itze  macht  dos  allis  de  Motorsag,   dos  Schwäre.  Itze  brauchn  se  när  ze  scheln,   aufzesetzen  un  ze  rucken.   Un  se  verdiene  aah  ihr  Gald.   Drum  sei  die  Gesichter  nimmer  esu  finster  wie  früher.   Ober  is  blebbt  immer  noch  schwäre  Arbit.  Pachschwarz  sei  de  Händ.   Dr  Azug  un  dr  ganze  Kerl  riechn  nooch  Wald.   Iech  ruck  allemol  ganz  nahnt  na.   Nort  kimmt  noch  dr  Hart,   dr  Fuhrma.   Do  denk iech  allemol,   dr  Stülpner  Karl  kimmt  rei  dr  Stub.   Dar  Dingerich  werd  überhaupt  net  alt,  wenn  ar  aah  schu  sibbzig  aufn  Kreiz  hot.   De  Pfeif  derf  natürlich  aah  net  fahln,  de  halblange  mitn  Schwenkerle.   Ja,  ja,  dr  Hart.   Dar  verstiht,   en  Baamries  aufzeloden,   als  ob  ar  Spielzeig  in  de  Händ  hätt,   is  dos  e  Fraad,   dan  zuzegucken!  Manichsmol  kimmt  aah  dr  Siegel  Kar,   e  Wildentholer  Fuhrma,  derzu.   Dar  muß  sich  bücken,   doß  ar  zr  Tür  reika.   Dan  seine  Händ  kenne  zupacken,   die  sei  wie  klaane  Schaufeln.   Dar  is erseht  in  dr  Dreißiger,   ober  e  Staatskerl.   Do  hamm se  mir  derzöhlt,   wenn  do  emol  ben  Tanz  eweng  Drascherei  war,   do  hot  sich  dr  Karl  när  emol  in  Saal  gedreht  -  un  do  war  allis  draußen  un  Ruh.

 Nu  sitzen  se  alle  in  dr  Rund  un  trinken  ihr  Nappl  Bier  un  emol  en  Harten,   ober  allis  in  Moßen.  -  Iech  muß  immer  erseht  eweng  nastierln,   eh  se  reden.  Menschen,   die  viel  arbiten,  reden  net  viel,   die  sei  bei  dr  Sach.  Die  sei  aah  kaane  Schreier  un  Lusmailer.  Die  begucken  sich  allis  genau,   eh  se  wos  derzu  sogn.  Un  wos  se  sogn,   is  darb  un  wahr  un  blebbt.  Do  gibt’s  aah  kaa  Übelnamme.  Su  ben  Erzöhln  derfährt  mr  noocherts,   wos  se  allis  nooch  dr  Arbit  noch  vürhamm.  Die  kenne  kaa  Ruh.  Dr  Will  is  drüber,   sei  Haisel  salber  ozeputzen,  drum  ka  ar  net  lang  bleibn.  Dr  Hart  hot  sich  en  Brocken  murige  Wies  als  Garten  agericht,   drum  muß  ar  ball  ham.  Dr  Kort  hilft  sen  Gung  de  Bachmauer  nei  aufsetzen,   do  hot  ar  heit  kaa  Zeit.  Dr  Max  is  ben  Hühnerstallbaue,   domit  die  Viecher  net  esu  eng  besamm  sei  müssen.  Dar  muß  aah  ham.  Un  dr  Kar  will  noch  e  Fuhr  Sand  zum  Wagbaue  huln.  Su  sei  se  alle.  När  schaffen  un  wörgn,  bis  de  Nacht  reikimmt.  När  immer  rührig  sei.  Sei  dos  net  Prachtleit?  Oder  iech  waß,   warum  dos  in  geden  su  drinne  liegt.  Dos  is  e  Stückl  Erbtaal  vun  de  Alten.  Is  muß  allis  schie  sei  derham,   is  Haisel,   is  Gartel,   de  Haamit.

Aus :  GLÜCKAUF,  anno 1988 N° 6

bearbeitet von pks